ឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន, ឯកឧត្តម កែវ រ៉េមី និងឯកឧត្តម ប៊ុន ហ៊ុន បាននាំយកអំណោយសម្ដេចក្រឡាហោម និងលោកជំទាវ ផ្ដល់ជូនប្រជាពលរដ្ឋចំនួន ៧៥គ្រួសារ

ប្រតិបត្តិតាមអនុសាសន៍ណែនាំដ៏ខ្ពង់ខ្ពស់ ពីសម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៅថ្ងៃទី២១ ខែកញ្ញា ឆ្នាំ២០២៤នេះ ក្រុមការងារក្រឡាហោមមនុស្សធម៌ ដឹកនាំដោយឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន, ឯកឧត្តម កែវ រ៉េមី និងឯកឧត្តម ប៊ុន ហ៊ុន បាននាំយកអំណោយសម្ដេចក្រឡាហោម និងលោកជំទាវ ផ្ដល់ជូនប្រជាពលរដ្ឋចំនួន ៧៥គ្រួសារ។

ប្រជាពលរដ្ឋចំនួន ៧៥គ្រួសារ ដែលទទួលបានអំណោយនាឱកាសនោះ អញ្ជើញមកពីឃុំទាំង៦ នៃស្រុកគាស់ក្រឡ ខេត្តបាត់ដំបង ដោយអំណោយដែលបានផ្ដល់ជូននាពេលេនោះរួមមាន៖ អង្ករចំនួន១ការ៉ុង មី១កេស ត្រីខ១យួរ ទឹកស៊ីអ៊ីវទឹកត្រី១យួរ កន្សែងពោះគោ១ និងទឹកសុទ្ធ២យួរ។

ក្នុងឱកាសនោះដែរ ឯកឧត្តម ខាន់ ម៉ាណេរ បានជម្រាបជូនពលរដ្ឋអំពីការផ្ដាំផ្ញើសាកសួរសុខទុក្ខ និងថ្លែងអំណរគុណពីសម្តេចអគ្គមហាសេនាបតីតេជោ ហ៊ុន សែន សម្តេចក្រឡាហោម ស ខេង សម្តេចមហាបវរធិបតី ហ៊ុនម៉ាណែត និងឯកឧត្តមអភិសន្តិបណ្ឌិត ស សុខា ជូនចំពោះប្រជាពលរដ្ឋទាំងអស់ នៃខេត្តបាត់ដំបង ដែលបានគាំទ្រការដឹកនាំរាជរដ្ឋាភិបាល និងចូលរួមថែរក្សាការពារសុខសន្តិភាព។

ឯកឧត្តម ខាន់ ម៉ាណេរ បានពាំនាំប្រសាសន៍សម្តេចក្រឡាហោម ស ខេង។ សម្តេចបានផ្តាំផ្ញើឲ្យខិតខំបង្កបង្កើនផល និងបន្តជឿជាក់ គាំទ្រលើការដឹកនាំរបស់រាជរដ្ឋាភិបាលនីតិកាលទី៧ ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី។ បន្ថែមពីនោះ ឯកឧត្តមអភិសន្តិបណ្ឌិត ស សុខា ក្នុងនាមជាប្រធានគណៈកម្មការជាតិសុវត្តិភាពចរាចរណ៍ផ្លូវគោក បានផ្តាំផ្ញើ សូមឲ្យបងប្អូនប្រជាពលរដ្ឋទាំងអស់ចូលរួមគោរពច្បាប់ចរាចរណ៍ ដើម្បីកាត់បន្ថយគ្រោះថ្នាក់ចរាចរណ៍ ជាពិសេសក្នុងឱកាសបុណ្យភ្ជុំបិណ្ឌប្រពៃណីជាតិនេះ៕